أنا نفسى مش عارف القرار صح والإ غلط .. أنا مش عارف أحدد أى شئ .. ساعات بقابل ولاد الوسخة وبعد معاهم والأقيهم بقو أصحابى .. مبقتش قادر أناهد أنى أمنع نفسى عن صداقتهم حتى .. أسعد لحظاتى وأنا سكران وبقنع نفسى أنى سكران عشان أقول اللى جوايا .. لكن حتى دى مبقتش عارف أعملها .. مفيش شئ بقى يسكرنى خلاص .. فى فراغ رهيب زانقنى .. لومينى وسبيلى أى شئ تشوفيه مناسب .. بس أن مش هأقدر أكمل .. أنا عمتا مش مرتاح وشكل الحالة هتطول .. وأنتى مش قادرة تفكرى معايا غصب عنك .. أنا زى اللى دخل شارع لابس كل هدومه وأتقلب فيها .. وطالع باللباس بس ... بس أنا عارف أنى كدة .. الرغبة فى أى شئ بقت عادية .. كل شئ بقى عادى جدا ... بعد مع أصحابى اللى بيعرفو يخرجونى من حالتى وبنحاول نقنع نفسنا أننا بنخرج .. ومبنخرجش .. بعد مع ناس تانية مفيش برضه .. الحقيقة أن برغم كل الناس دى اللى من كل لون الإ أنى أكتشفت أنى ماليش حد فعلا بيعرف يخرجنى من حزنى حتى أنتى وأنا .. أزمتى أنى مفيش سؤال ولا فى إجابة .. كنت بتضايق لما الأقى الحلقة ناقصة أنا مش لاقى الحلقة أصلا دلوقتى .. حتى الكتابة مش عارف أكتب أجى أكتب قصة الأقينى بكتب أغنية .. جميل والناس كلها بتقول عليها عظيمة .. بس برضه مش ده اللى أنا عايزه .. أنا عايز أعمل اللى أنا عايزه .. فضلا على أنى حاسس أنى سحلت نفسى فى مسارات مش بتاعتى .. مش كل حاجة الواحد بيفهمها أو بيتنقها ينفع يعملها .. بغالط نفسى ومشكلتى أنى مبغالطش حد برغم كل ده .. مزعلتش حد منى غيرك .. تقريبا أنا هأفضل كدة مزعلش منى غير أغلى الناس عندى .. بس أنا زعلان .. حاسس بوحدة ومش عايز أقرب من حد .. وحدتى أرحم بكتير من السحل فى كل شئ مكرر .. الموضوع مش شخصى أبدا .. من كام يوم كنا بنحشش وكنا 6 وإتفقنا أن الجوينت هيعدى علينا إحنا الستة بالدور .. ومن كتر محنا خربانين فضلنا ساكتين مركزين لغاية معدى على واحد واحد فينا .. أنا كدة .. قاعد مستنى كل شئ وعارف أنه جاى ومبيغيروش مش لأنى مش قادر لكن لأنى إرتضيت مصيرى مع الجوينت ده .. حتى أى شئ هيفيدنى مبقتش مهتم بيه أصلا .. الصحفية الإنجليزية اللى كنت حكتلك هتاخد قصتى القصيرة وتنشرها فى كتاب عن الثورات العربية .. الست جات مصر وأعدت 3 أيام ومروحتش قابلتها ولا كلمتها حتى .. مش فارقة .. صاحبى الممثل كلمنى عشان سيناريو الفيلم اللى كنت كاتبه .. قلتله طيب ومردتش عليه .. مش زهد لاء أنا طالع دين أمى ومحتاج أى شئ بس هى مش فارقة فعلا .. الأغنية اللى كتبها كلمت حرارة عليها عشان يعملها مزيكا .. محدش كلمه عن المزيكا من بعد الثورة .. إنبسط جدا .. وإتفقنا أنى هغنيها .. نفسى طلع قصير جدا وأعدت أشحر .. على طالباب قالى أغنيها عشان مفيش رابر بيغنى كلمات حد تانى .. أنا هأغنيها بس عشان هى مش فارقة أديها لحد والا لاء المهم الكلام يوصل .. فات 4 شهور على مقاطعتى لأبويا ومش حاسس بأى شئ .. إحنا مرتاحين كدة .. ماما إتحسنت شوية بس لسة المشى متظبطش .. أختى هتولد خلاص .. هأبقى خال أهه .. جاين أضربت فى الضاهر عشان دافعت عن نانسى اللى اتحرشو بيها .. جاين طيبة أوى وبنحب بعض جدا بس مكلمتهاش .. جاين عايزة تطبق القانون فى البلد الوسخة دى وفى حى شعبى كله مقفل على كله .. جاين مثالية أوى .. مرات حموكشة ماتت .. بس معزتوش .. كنت ناوى أكتبلك حاجة تقنعك .. بس مكتبتش
